ناقة صالح

[الشيخ عادل]

اخوانى واخواتى الاحباب اعزكم الله واحبكم

قلت انى اغير لكم شويه فى نوعيه كتاباتى وفكرت اكتب عن ايه ولقيت الحل ..
كنت زمان قرأت للكاتب الساخر احمد بهجت عن قصص الحيوانات فى القران.
وقلت اكيد فى منكم كتير لم يعرفوا تفاصيل عنها ومعلش نغير شويه واللى منكوا معترض يقول لى وانا اوافق على طول ..اتفقنا نبتدى بسم الله ..

ناقة صالح

هَـذِهِ نَاقَةُ اللّهِ لَكُمْ آيَةً فَذَرُوهَا تَأْكُلْ فِي أَرْضِ اللّهِ وَلاَ تَمَسُّوهَا بِسُوَءٍ فَيَأْخُذَكُمْ عَذَابٌ أَلِيمٌ
(الأعراف 73)

فى غاية الفخر أنا...!
فى غاية الفرحة أنا..!
فى غاية العزة أنا..!

ورغم انى يادوب ناقة..ناقة..ولكن بكل ثقة أقدر أقول..انى أشرف من أشرف واحد فيكم دلوقتى..
وقبل ماتزعلوا ..اسألوا نفسكم..حد فيكم..ربنا نسبه لنفسه؟؟؟

أنا ربنا قال فى حقى (هذه ناقة الله)..حد فيكم قدر يقرب من 1\10 من الشرف ده؟؟

هه؟؟..فيه حد؟؟..صوتكم واطى ليه؟؟..يعنى ماحدش فتح بقه..

خلاص..اسكتوا بقة واسمعوا حكايتى..



القصة دى أنا بكتبهلكم دلوقتى..وأنا فى غاية السعادة..
حاسة كأنى طايرة..بياض فى كل مكان..عطور مالية الدنيا..نشوة وبهجة وفرحة تجتاح جسدى كله!!!
أصلكم مش واخدين بالكم..أصلى تقريبا بطلع فى الروح!!!!..بموت يعنى!!!

بس مش أى موتة..دى شهادة..شهادة فى سبيل الله..الكفار بيدبحونى..فيه ايه أكثر من كده..
عشان كده حتلاقونى فرحانة شوية..!!

بكتبلكم القصة دى بدمى المتفجر من عنقى..

أحب دلوقتى أوضحلكم حاجة..أنا صحيح ناقة..بس فى الجوهر..مش ناقة!!!!!
حاولوا تفهمونى..انتوا الكائنات الوحيدة ذات العقول!!!

أنا ناقة فى الظاهر..بس الجوهر.. أنا آية من آيات الله..وهذا يزيدنى فخرا!!

ومعجزة إلهية..وهذا يزيدنى سعادة!

ودليل على صدق نبوة صالح..وهذا يزيدنى ثقة!

وفوق كل هذا..أنا فى الأصل حتة صخرة!!..وهذا يزيدنى عجبا من قدرة خالقى!!

واضح إنى زدت فى حاجات كتير..عشان كده تلاقونى سمينة شوية!!

وقفنا لحد فين؟؟..آه..

حتة صخرة..حجرة..يعنى فى اعتقادكم..لا أرى ..لا أسمع..لا أتكلم..

وطبعا ده إعتقاد كثير من حضراتكم...فوالله..الجماد أكثر رقة من قلوبكم!!

اتخلقت فجأة..يعنى فجأة..لقيت نفسى ناقة كبيرة كده زى مانتوا شايفين!!!
الموضوع عايز شرح..
ححكيلكم من البداية..


ححكيلكم من الأول..من قبل مالمعجزة دى تحصل..الكلام ده عرفته بعدين صحيح..بس ترتيب الأحداث..يخلينى أحكيهلكم الأول

فتحوا عنيكم وودانكم..دى مش البقرة أم 6 رجول... ولا عروسة البحر ....
ولا البنت دلال الكهربائية اللى تحط اللمبة عليها تنور..
لأ..
دى معجزة إلهية..على الله يسيرة..ومجرد تصديقها علينا عسير..


الحكاية بدأت بالآتى

ثمود...

أكيد سمعتم عن الإسم ده..قوم ثمود..أقوياء الشهوات..ضعاف العقول
واللى زاد وغطى..غنى فاحش..زود من فجورهم
عباد للأصنام..الهبل ولاد الهبل..
نفسى أفهم..سؤال حيجننى على مر العصور...إزاى تفكر بعقلك كده..إنك تعبدحجارة؟؟

حد يرد عليا..مش ثمود دول كانوا بنى آدمين زيكوا؟؟
حد يوضحلى وجهة نظرهم!!!!

ما علينا..كانوا بيعبدوا الأصنام.. بس مش كلهم..

كان هناك منهم رجالا..يهيمون بوجههم بحثا عن الحق..
وهل يضل الله من يبحث عنه؟؟
طبعا لا..
إنه رؤوف بعباده..مش ممكن يضل واحد عايزه

فمنهم من كان يؤمن بفطرته وعقله ورحمة ربه..ويعتز أهله وما يفعلون..

ولكن الفجور كان شديد..وبيزيد..والناس انجرفت ورا المصالح والذهب..

وانجرفت وراء عبادة الأوثان والنفس ذات الشهوات التى لا تنتهى..

ثم شاء الله العلى القدير..أن يقلب الموازين..ويضع حدا لفجورهم..

ولكن رأفة بهم..بعث فيهم نبيا..منهم..من أنفسهم والله..

كان هو أصلحهم فعلا وأكثرهم إيمانا..

راجل صالح

واسمه صالح.. اسم على مسمى.

كان فعلا..أكثر قومه توحيدا ونقاء وطهرا وصلاحا..

لو شفتوه..
لايمكن تنسوا الطيبة..اللى بتبان فى عنيه..

عليه أفضل الصلاة والسلام

وأوحى الله إليه بالتكليف..

وطبعا ماتأخرش.. جرى على قومه.. كان بيحبهم قوى..

وبدأ المهمة..
قال لهم :

يَا قَوْمِ اعْبُدُواْ اللّهَ مَا لَكُم مِّنْ إِلَـهٍ غَيْرُهُ

نفس الكلمة دى..قالها قبله هود ونوح..وكل الأنبياء عليهم الصلاة والسلام..

نفس الكلمة والله..ومافيش فايدة..

المشكلة انه ما قال لهم حاجة صعبة لاسمح الله!!

دا بيقولهم ياقوم..اعبدوا الله..

بس..مافيش أكتر من كده..

بس للأسف..الدخول بدين جديد..يعنى تغيير شامل فى المجتمع..

يعنى ناس تطلع وناس تنزل..وده بالنسبة لعاشقى الدنيا..محال.

نعبد الله؟؟..معقول

ونسيب آلهتنا اللى بناكل على أفاها عيش؟؟وتجارتنا وحياتنا؟؟

هو ده تفكيرهم المشلول العقيم..

الغريب ..انهم ردوا على صالح رد..بدا لى أنا الناقة..الناقة..الناقة...
أنه طلسمة..خزعبلات..كلام فارغ.. قالوا :

يَا صَالِحُ قَدْ كُنتَ فِينَا مَرْجُوًّا قَبْلَ هَـذَا أَتَنْهَانَا أَن نَّعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِّمَّا تَدْعُونَا إِلَيْهِ مُرِيبٍ

دا إيه المنطق ده؟؟
واحد جايب دين جديد..ويبقولكم اعبدوا الله..حايقلكم ازاى متسيبوش أصنامكم؟؟

تاملوا معى المنطق المعكوس..

ماذا يفعلون فى آلهة الجدود والأسلاف..كيف يدارون خجلهم أمام ذكرى الآباء والأجداد إذا أهملوا عبادة آلهتهم؟؟؟!!!!!!

فعلا مشكلة عويصة جدا!!!!!

أنا بصفتى ناقة حالية..وصخرة سابقة..أرفض هذا المنطق..

ولو عرضتم المنطق ده على خروف..مش حايبطا مأمأة من السخرية!!!

اللى كان المفروض يحصل..طالما صالح مل احترام وتصديق..يبقى نبوته تبقى زيه..
لكن اللى حصل كان العكس تماما!!!

ياترى ايه اللى حصل ..

ناخد فاصل عشان نتواصل

يتبع

[center][size="5"]

[الشيخ عادل]

طبعا صالح ماكنش لازم إنه ييأس منهم بسرعة..ده تكليف إلهى..وخليك ورا الكداب لحد باب الباب..
فأشاح صالح عن منطقهم المعكوس..وسألهم

-تصدقوا إزاى إن أنا نبى؟؟
-أنت تقول أنك نبى..ونحن نشك..لازم تقدم بينة

-طب عايزينى أقدم إيه؟؟

-ماتتصورش إننا عايزين نعجزك..بس طالما بتقول إنك مرسل من خالق هذا الكون..يبقى لازم تقدم بينة تليق به!!
-عايزين إيه بظبت؟؟

-شايف الجبل ده؟؟ ليه مايتولدش منه ناقة؟؟؟!!!

-أنتم تطلبون آية مادية خارقة..وهذه الآيات خرق للناموس..وليس من أدب العباد أن يطلبوا من ربهم خرق الناموس لكى يؤمنوا به!!!!
-إعترف أنك لا تستطيع!!
-أنتم تتصرفون مثل الأطفال..
-ياصالح..من حقنا وأنت تزعم أنك مرسل من الله..أن تقدم لنا دليلا
-خايف عليكم
-من إيه؟؟
-أخشى لو أجبتكم لما طلبتم..أن تكفروا بهذه الآية بعد حين..أخاف عليكم من عذاب الله لو فعلتم
-نحن نعاهدك أن لا نكفر بها..ولا نمسها بسوء
-وعد؟؟
-لك عهدنا جميعا

لحظتها فقط..بدأ صالح الدعاء لله العلى القدير..
ورغم إنه مش من حقهم..بس عشان بيحب عبده صالح..وفى نفس الوقت مايبقاش ليهم حجة..

حدثت المعجزة..

وتمت ولادتى من باطن الصخور..ولى هنا وقفة..
عشان من أول هنا..أنا عاصرت الأحداث..
أنا كنت إيه؟؟صخرة فى حضن الجبل..كنت فى وسط أصحابى وأهلى وجرانى
مابنعملش حاجة..غير التسبيح..كانت حياه فى غاية الروعة..

فجأة..

وبدون مقدمات..
شعرت بليونة غريبة تجتاحنى..
جسدى الصخرى..يتشكل ويتلون..ما هذا..جسم..أطراف..لسان..يا إلهى!!!
ماذا يحدث لى..؟؟
مع هذه الليونة المفاجئة..سقطت من الجبل..صرخت على أهلى..ولكنى لم أعد أراهم كما هم..
فقط صخور صماء..لا تسمع ولا ترى!!
كنت أسقط ..أسقط..أسقط..ولأول مرة ينتابنى مثل هذا الشعور..
الخوف من الموت!!!!!!
وفجأة..
انخفضت سرعة هبوطى تدريجيا..حتى زجدت نفسى أقف على الأرض..مستندة على 4 أطراف..
مازلت لا أفهم شيئا!!
بكيت..ما هذا..مياه تتساقط من وجههى؟؟هل هذا ما يسمى بكاء؟؟
صرخت...
إلهى..لا أفقه شيئا..وأنت الحكيم العليم..
وجاء الرد..
لا..مش عن طريق ملك ولا حاجة..
جه كده..أيوه كده..كل حاجة..قفزت إلى رأسى فجأة..ولقيت نفسى فاهمة كل حاجة..وكأن كل حاجة حصلت على إيدى
وعرفت لحظتها..إن أنا...أنا...

أنا ناقة الله

ومن ساعتها...ضاعت الكآبة..حل محلها الفرحة..والحماس!!!
أحب أعرفكم بنفسى أكتر كناقة...

أنا كا البراءة..والطهر..والنبل.. والصفاء..

مش كلام كده وخلاص..لا والله..فعلا ده اللى ربنا حطه جواية..من ساعت ماحولنى من صخرة..لناقة
خرجت على الناس وهم مبهورين طبعا..مش قادرين ياخدوا نفسهم..

المعجزة تحققت..الجبل..ولد ناقة..

أحنوا رؤوسهم لصالح..واعترفوا بنبوته
قال لهم صالح :

هَـذِهِ نَاقَةُ اللّهِ لَكُمْ آيَةً فَذَرُوهَا تَأْكُلْ فِي أَرْضِ اللّهِ وَلاَ تَمَسُّوهَا بِسُوَءٍ فَيَأْخُذَكُمْ عَذَابٌ أَلِيمٌ

وانفضوا من حولى...
وبدأت رحلتى فى المدينة...

ونقف هنا عشان اخد نفسى شويه
ويتبع

[الشيخ عادل]

قصور وبيوت منحوتة..تماثيل فى كل مكان..حدائق..مكان مهيب بحق
استيقظ الناس فى الصباح..والتفوا حولى بحذر..
كانت أى حركة أعملها حتى لو حركت راسى..ترعبهم وتخليهم ينطوا لورا..
الموضوع ده ضايقنى عشان قيد حريتى قليلا..

واللى ضايقنى أكثر الأحاديث الهامسة اللى ماكنتش بسمع منها حاجة..
شعور غبى قوى لما تبقى قاعد فى وسط جماعة..كلهم بيتكلموا عليك بصوت واطى وانت عارف!!!!

وظلوا على حالهم هذا أيام..لحد ما جه طفل صغير..قرب منى بشجاعة..ومد إيده.
أنا خفت ورجعت براسى للخلف..بس فهمت إن هو عايز يطبطب عليا..
اومئت له دماغى وسط صيحات الأهالى للطفل بالابتعاد :
ارجع يا واد ..؟
بس الواد مارجعش..والتصرف ده..كسر كل المخاوف..

ومابين يوم وليلة..كان كل القوم حبايبى!!!!..وفى اليوم التالت من ظهورى فى أرض ثمود..أنجبت صغيرى!!!
نعم..فى اليوم الثالث أنجبت صغيرى..ومش عايزة تعليقات سخيفة!!!

جذب وليدى إهتمام الناس أكثر منى أنا..وزادت علاقاتنا أنا وصغيرى بالقوم..
وبدأت أرضع صغيرى..لبن طبعا..

اللن جذب الناس جدا..ريقهم جرى..فجريوا هم كمان على صالح..يستأذنوه إنهم يشربوا من اللبن ده!!
صالح قال لهم..اللبن مباح برحمة الله..بس الماء حايتقسم بينى وبينهم..أنا أشرب يوم..وهم يوم..
وطبعا الأمر ده وحى إلهى بحت..أنا يوم وهم يوم..وفى اليوم بتاعى هم يشربوا لبن..وفى اليوم بتاعهم..أنا أرضع صغيرى..
كان اقتراح جميل فعلا..وهم وافقوا عليه..

كنت كريمة معاهم فعلا..كنت أنزع ثديي من فم صغيرى..لأرضع طفلة من قوم ثمود..كان لبنى جميل المذاق فعلا!!!
والغريب..أن من يشرب منه..لا يظمأ ولا يجوع!!!!
أحبنى المجتمع كله..فقد كنت أطعمه وأسقيه...
ومرت أيام فى غاية السعادة والهناء..!!
وفعلا..مرت..وعدت الأيام الحلوة..وأكيد انتوا عارفين..
الأيام الحلوة..بتعدى فى ثوانى

مش كل القوم آمنوا..لم يزل هناك كثير من الأثرياء الحاقدين..وكانوا يدبرون..ويتكتكون!!!
وبدأت تدريجيا أشعر بستار من الكراية يحيط بى!!
وانقسم المجتمع قسمين..قسم مؤمن بصالح..وقسم كافر وحاقد..
وفيوم دار بينهم الحوار ده: فى قول الله سبحانه وتعالى :

-قَالَ الْمَلأُ الَّذِينَ اسْتَكْبَرُواْ مِن قَوْمِهِ لِلَّذِينَ اسْتُضْعِفُواْ لِمَنْ آمَنَ مِنْهُمْ أَتَعْلَمُونَ أَنَّ صَالِحًا مُّرْسَلٌ مِّن رَّبِّهِ
-قَالُواْ إِنَّا بِمَا أُرْسِلَ بِهِ مُؤْمِنُونَ
-قَالَ الَّذِينَ اسْتَكْبَرُواْ إِنَّا بِالَّذِيَ آمَنتُمْ بِهِ كَافِرُونَ

المشكلة..إنه كالعادة فى كل زمان ومكان..المؤمنين غلابة..والكفار جبابرة!!!
قلقى بدأ يزيد..وحسيت إن فى مكيدة فى الموضوع
وفعلا...
أرسل كبير الكفار إلى كل سادة ثمود ..ودخلوا إلى قصره..ليبحثوا كيفية القضاء على دعوة صالح التى نزعت منهم كل سلطان؟؟!!
وبدؤوا يتجاذبون أطراف الحديث
-وجود ناقة ترعى بحريتها قد نزع منا كل سلطان على القبيلة!!
-وجود الناقة تذكير مستمر للناس بصالح ونبوته
-ما هو الحل؟؟
-التخلص من الناقة!!!!
يتخلصون منى أنا..أنا النبل والطهارة والحب..
يقتلون الخير بأيديهم!!!
فزع بعضهم من الفكرة فى البداية..فقد حذرهم صالح ألا يمسونى بسوء..وتراجع الكثير بالفعل..
ولكن زعيمهم لم يكن ليتركهم...أديرت كؤوس الخمور..ولم يعد هناك من يدرى شيئا ..أو يخاف شيئا..العملية شعشعت خالص
وبدأت مباحثات أخرى...
وبعد أن كان السؤال..ماذا نفعل بالناقة..تحول إلى كيف نقتلها..ثم تطور الأمر..مين اللى يقتلها!!!

أكتر حاجة كانت مجننانى..إنى مش فاهمة ليه..ليه عايزين يقتلواالخير؟؟
أنا عملتلهم إيه؟؟..أنا ماضرتهمش فحاجة..
أحنيت رأسى..ومضيت فى تقديم اللبن لمن يريد..شعرت أن قرار ذبحى قد صدر..ولم يبقى إلا التنفيذ..
وأحسست بالحزن ذات ليلة..وابنى الصغير يستدفئ فى صدرى..حزنت على مصير البراءة..
لماذا يذبح الناس البراءة فى هذا العالم؟؟؟

ومضيت أقدم اللبن..ومرت ليلتان..وجاءت الثالثة..وأحسست أنها الأخيرة..
وجاء تسعة من العتاه..أشار إليهم الله بقوله:

وَكَانَ فِي الْمَدِينَةِ تِسْعَةُ رَهْطٍ يُفْسِدُونَ فِي الْأَرْضِ وَلَا يُصْلِحُونَ

دول اللى دبروا..واللى نفذ أشير اليه بوصفه صاحبهم...

إِنَّا مُرْسِلُو النَّاقَةِ فِتْنَةً لَّهُمْ فَارْتَقِبْهُمْ وَاصْطَبِرْ وَنَبِّئْهُمْ أَنَّ الْمَاء قِسْمَةٌ بَيْنَهُمْ كُلُّ شِرْبٍ مُّحْتَضَرٌ فَنَادَوْا صَاحِبَهُمْ فَتَعَاطَى فَعَقَرَ

كان سكران..دخل وهو بيتمايل من السكر..السيف كان بيلمع فى إيده لمعان..خلى صغيرى يبكى..نفسه كان أشد سوادا من عمق الليل..
رفع سيفه لأعلى وهو لايكاد يرى..
انحنيت أحمى صغيرى..
قطع السيف قدمى..سقطت ساجدة من الألم..
ورفع سيفه مرة أخرى..
السيف يلمع..
أنفاس الرجل قاتلة..
وصدقوا أو لا تصدقوا..البرق يضئ على السيف..
لابد أنها الأخيرة..

لاتخافى يا ناقة الله..أنا ملك كريم..وقد كنت فتنة وآية لقوم ظالمون..والآن يخفف عنك الله,,ها أنت شهيدة فى سبيله

هبط السيف على رقبتى..أعتقد أنها النهاية..لم أعد أقوى على كتابة المزيد..
شعور رائع بالفعل..الشهادة..

أما مصير ثمود..فها هو أمامكم


إِنَّا أَرْسَلْنَا عَلَيْهِمْ صَيْحَةً وَاحِدَةً فَكَانُوا كَهَشِيمِ الْمُحْتَظِرِ

واسيبكم فى رعايه الله ..حد عايز حاجه

وفضفضه اخرى مع الشيخ عادل