..........الشمس نـاويه ع الرحيــل

[ضياء الدين البري]

السلام عليكم .. مجرد رأي
احترامي وتقديري

الشمس نـاويه ع الرحيــل
...........

القلب جوّ الشرنقه
عايش في حضن المستحيل
لسّاه عليل وسط الدمار
سكناه دموع تطرح عويل
يادي الزمان ارحل بقي
خلينا نرسي ع الدليل
إن كنا من أهل الديار
أو جم جدودنا رحّالين
عايشين نفكر في انتظار
وعقولنا عايشه مبعزقه
محتاره توزن بين نارين
إما تعيش ساكت ذليل
ياتروح تموت في أي غار
كفايه عشت ف دفلقه
مرت عليك طول السنين
يظهر نسيت تبقي انت مين
انت اللي جيت ومعاك شقا
جاي ف زمن كله انهيار
شوف الحياره نهار وليل
وبطون جعانه تروح لمين
وعيون سكاره مبحلقه
حتي الجنين عايش حزين
مسكين وعايش ف انكسار
خايف يكون حظه قليل
يعيش حياته ف المرار
يلبس قضيه ملفقة
يتمني لو يفضل سجين
جوّ الرّحم عايش أمين
وحياته تبقي مزوّقه
من غير مذله أو أنين
ياخلق قولوا إحنا مين
خليتوا حالنا ف مزنقه
حتي الطيور صابها الصعار
م الجوع ونسيت زقزقه
الشمس ناويه ع الرحيل
في الغرب عايشه موفقه
حتي الشيطان بلـّغ فرار
من كتر حبسه ف الكمين
وكفايه إن الليل طويل
ممكن تكون طيب أمين
والتهمه جاهزه مزوقه
بسرعه تسكن في الكرار
يشهد عليك واحد عليل
وجماعة تانيه كدابين
تشهد تجيلك مشنقه
وال إمته ينسونا الكبار
لناس ما بتردش جميل
رب العباد ناصر معين
قادر كريم يخلق نهار
يرد حق المظلومين
يحمينا من شر الدّوار
ينصف عباده المخلصين

.......
أشكركم
وللجميع تحياتي