قلت آه يالمعبود يا رب رحماك ***** يا خالقٍ خلقك من النار والطين
يا رب ما قدّرت نقبل من رضاك ***** نرضى بمقسومك على الحكم راضين
ونّيت من علمٍ لفاني بفرقاك ***** يا خوي موتك قسّم القلب قسمين
يا حسرتي يا ضيقتي صحت أبنخاك ***** وجرّيت عالي الصوت بين المعزين
يضيق صدري يومي أذكر سواياك ***** والقلب طاهر يا صديقي على الدين
ما مرةٍ يا خوي غيرت ممشاك ***** لا ولا تمشي دروب الرديين
لا جاك محتاجٍ ضحك له محيّاك ***** تعطي الفقير وتحتفي بالمساكين
أنا أشهد إنّا بالمراجل عرفناك ***** صايم مصلي مع جموع المصلين
تذرف دموعي يا رفيقي بلا إياك ***** حزن المفارق وسط دم الشرايين
شفتك مسجّى فوق نعشك بلا حراك ***** والقلب ذاب بداخلي وأحرق العين
قمت أتصبر وأتأمل حلاياك ***** وأقول بالجنة ودار الشهيدين
الله يرحمنا إذا إنّا تبعناك ***** وصرنا بقبر وراحوا الأهل مقفين
الله يصبرني أنا كيف أبنساك ***** يا كيف أنسى وأنت بعدك يتيمين
ابنك وبنتك وأمهم تطلب رضاك ***** ويدعون لك في جنة الخلد آمين
الله يصلحهم على طيب ذكراك ***** من بعد عينك جعلهم لك شفيعين
وأقول للي تنثر الدمع تنعاك ***** تصبري يا خيتي لا تصيحين
والخاتمة يا ربي يا ربي رجواك ***** والله يرحم من توفى بالاثنين
صلاة ربي عد ما حج نسّاك ***** و أعداد ما تدعي جموع الملبين
سلمان الوهبي
النمط الخطي
