الحدود
أشعار سيد حجاب
وإحنا فايتين ع الحدود
مستمرين فى الصعود
اختفى النيل الجميل من تحتنا
والمدن .. والريف
وأول عمرنا ..
وابتدا شىء ينجرح جوة الوجود
وابتدينا أسئلة مالهاش ردود ..
ميلنا ع الشباك نخبى
دمعة فرت مننا ..
بصة من الشباك على البحر البعيد
واحنا رايحين بالامال عالم جديد
كنت فاكرة يامصر إنى تعبت منك
واكتشفت إنى محال استغنى عنك
حتى دوشة صوت جيرانى
والزحام وحشونى تانى
بسمة حلوة لطفلة لسة صغيرة
لما كنت أديها حتة سكرة
قبل مانسيبك وحشتينا
يامصر ياأمنا ..
وابتدا شىء ينجرح جوة الوجود
وابتدينا أسئلة مالهاش ردود
ميلنا ع الشباك نخبى
دمعة فرت مننا ..
كنت بتذكر وانا فى غاية الأسى
لعبنا الكورة فى حوش المدرسة
والشقاوة وإحنا لسة صغيرين
والبراءة والصحاب الطيبين
لما سألتنى اللى جنبى
إنت مصرى؟؟ دق قلبى
اسمى زى السحر رفرف ع المكان
زى نسمة مهفهفة بصوت الأدان
أيوة مصريين لآخر كل نقطة فى دمنا
أيوة مصريين لاخر كل نقطة فى دمنا
من وجوه من تلج وعيون من ازاز
شوقى زاد للعشرة والناس العزاز
وابتديت أكتب وانا فوق السحاب
ابتديت ياحبيبى فى اول جواب
مصر إنتى حتة منى
مش مجرد اسم وطنى
قالوا فاضل نص ساعة ع الوصول
قلت إيه معنى الساعات والا الفصول
الا فى الأرض اللى فيها ذكرياتنا وحبنا
الا فى الأرض اللى فيها ذكرياتنا وحبنا
وابتدا شىء ينجرح جوة الوجود
وابتدينا اسئلة مالهاش ردود
ميلنا ع الشباك نخبى
دمعة فرت مننا
ميلنا ع الشباك نخبى
دمعة فرت مننا ..
شكرا لك يا سيد حجاب
على مشاعرك الطاهرة
__________________
" كان بودي أن آتيكم ,, ولكن شوارعكم حمراء ,,
وأنا لا أملك إلا ثوبي الأبيض ",,
* * *
دعــهــم يتــقــاولــون
فـلــن يـخــرج الـبحــر
عــن صمته!!!
آخر تعديل بواسطة ياسمين ، 25-10-2008 الساعة 03:29 AM.
|