قصـــــــــة غرام
الله من دنيا رمتني بحورها
في ديرة وحشة ولا حد يزورها
يا كود من مثلي من الشوق يشتكي
ودموع عينه فوق خده بحورها
فارقت من حبه تمكن بخافقي
خلى هوى روحي وغاية سرورها
وبكيت مما صاب نفسي وهزها
والنفس شوف الولف غصب يثورها
لامن تذكرت اللي مضى لي تنثرت
دمعات حزن فوق خدي حرورها
وهوجست باللي فات ثم عدت قصتي
قصة غرام ضيعتها دهورها
عقب الهوى والمزح والحب والوفا
غصون قلبي ودعتها طيورها
دنيا تقلبني على غير ما اشتهي
والنفس هوجاس المحبة يجورها
مشعل المطيري