يادارنا من جاك جيناه عجلين
 

من اروع قصائد الشاعر الفحل والفارس المغوار عبيد الرشيد وهي بعد معركة بقعا عام 1257ه اللي انتصروا فيها على قبيلة عنزه واهل القصيم:

يا مل ّ قلب ٍ بين خمسة وعشريـن
هجس ٍ وهاجوس ٍ وعـدل ٍ ومايـل

يديرهـن دولاب الأفكـار تسعيـن
بالصـدر ينشـر دقّهـن والجلايـل

وأصبحت منهن جايز ٍ كـود ثنتيـن
سعدى ومصقول ٍ يـداوي الغلايـل

وخماسيٍ عمق ٍ صوابـه وجوزيـن
إلى أقرنوا قحص المهار الأصايـل

يا دارنا من جـاك جينـاه عجليـن
بالليل نسـري والصفـر والقوايـل

فأن كانهـم عنـا بالأنشـاد محفيـن
بالـراس مـا نعتـاز دز الرسايـل

ناتي مع أول سربة ٍ وقـم الألفيـن
كن الشهر بـه ديدحـان المسايـل

حضر الجبل والبدو نلحق صليبيـن
يتلن لنـا جمـلات سـود الجدايـل

جينا صبـاح وهـم لنـا مستكنيـن
وثار الدخن من حر ّ صلو الفتايـل

حصل لنا عقب المواصل وفا الدين
وراع السلف ردت عليـه الجمايـل

عجاجة ٍ تجلى صدى القلب يا حسين
دبيلـة ٍ مــا مثلـهـا بالدبـايـل

ربعي مرويـة السيـوف المسانيـن
خلّوا صفا بقعاء مـن الـدم سايـل

كم ميمر ٍ داجـوا عليـه الغلاميـن
خلّوا دماغـه عـن علابيـه مايـل

اللي ذبحت بشذرة السيـف تسعيـن
منهم , ولاني عن طَرَدهـم بسايـل

ذبحت أبو صالح سعـوط المجانيـن
وأودعت دم الشيـخ بالقـاع سايـل

واللي وطينـا مـا تشوفـه محبيـن
والكـذب تنفيـه العلـوم الصمايـل

جونـا يبـون ديارنـا والبساتـيـن
يبغـون منزلهـم قفـار ٍ وحـايـل

واليـوم يبغونـا وحـنـا معيـيـن
نجدع بحد السيف من جـاه عايـل

وأدلى على ربعه يسـوق الفراميـن
فيـدت عماهـم تايهيـن الـدلايـل

يصيح مثل البارحـة ماهنـا شيـن
ولا حصل له كود قطـع الوصايـل

يقول جده يوم صولـة هـل الديـن
قـادوا عليهـم ذاهبيـن الحمـايـل

واللي عطوا حق الديار .. الهزازين
وحنا إلـى عـدت علـوم القبايـل

ربع ٍ على حرب المعادي ضريرين
مـن سابـق ٍ كسّـابـة للنفـايـل

أغداه بالمكحـول خـرط الفراقيـن
وعرضاتهم في مشرفـات النثايـل

أطاع حكـي الذايـدي والسلاطيـن
وقبله ( لويبان ٍ ) رُمـي بالحبايـل

ناس ٍ يبـون العـز منهـم ذليليـن
وش قال مشعـان ٍ بهـم بالأوايـل

عندي له اللـي يلبسـون التواميـن
إلى اجذبوا شروى بروق المخايـل

يتلون عيد الضيف ريف المساكيـن
الشيخ ابو متعـب عزيـز النزايـل

إن سلم راس الشيخ حنـا عزيزيـن
نرجيه من معطي العطايا الجزايـل

إلى بغا أمر مـا يطيـع المشيريـن
الحيـد شيّـال الحمـول الثقـايـل

من فضل رب العرش عدل الميازيـن
صارت على القصمان وأولاد وايل

وصلوا على قنديل سكن الحجازيـن
راع المقـام المعتلـي والوسـايـل

مني عدد ما شمّـع اللبـن بالطيـن
أومـا لبيـت الله تشـدّ الرحـايـل

- سعدى ومصقول : سعدى فرس عبيد بن رشيد .. ومصقول سيفه
2: خماسي ٍ : يقصد البواريد
3-وقم الالفين : حول الالفين
4: ابوصالح هو يحي بن سليم امير عنيزه وفارس مشهور
5: الشيخ ابو متعب هو عبدالله العلي الرشيد امير حايل و اخو عبيد

وسلامتكم